港大民意調查，立法會議員民望，無論親中保皇，定係反董亂港，全線報跌，連平時冇出聲、冇立場，專責扑槌指揮交通嘅主席范太，都跌成五巴仙咁多！
咁就證明，啲「民意」意向好難捉摸！例如港版哲古華拉咁，當初選民選佢，就係貪佢敢紮紮跳反枱！今次民意跌，又有佢份！咁又係嘅，長毛入咗立法會，表現太過斯文，棺材未抬過一副，只係識得辯論，又唔見佢個袋裝隻馬騮，入嚟立法會放出嚟，范太喝佢坐低，佢就乖乖哋坐低，毛主席話頭：革命不是請客吃飯，而毛主席的好學生長毛表現，十足《大長今》嘅一名煮飯婆咁，點夠喉呀！
媾鬼妹，百日先至得兩件咁少，對於土共維園阿伯，長毛又未能伸張民族大義，洗雪國恥，成績差強人意，真係裏外不是人，所以我哋特區哲古華拉就難免失咗少少分，想隊番上去，喺立法會同蘭桂坊呢兩條戰線，長毛就要加吓油嘞！
至於毛主席另一名好學生大班亦跌咁啲分，咁亦係意料中事！大班捍衞法治，搞出一鑊領匯事件，成功制止董團夥將屋邨商場上市，因此遭到圍攻！正所謂三人成虎，兼阻人發達，大班民望上升先至離奇喎！
至於范太，做主席都要民望暴跌，就證明啲民意真係冇晒理性喇！唔通憑一句「趙紫陽貢獻不及鄧小平」，得嗰十個字，就每個字值半點？咁年年堅決組織六四燭光會嘅司徒華，未退役嗰陣，民望咪應該年年冠軍？又唔係喎，真係𢱑晒頭嘞！
民建聯元老曾鈺成，成年唔聲唔聲，唔抬棺材，又唔保釣，咁又跌點幾，就重加離奇！唔出聲潛水都有罪？定係其實因為黨友主席不幸患癌，分享到少少同情分，拉平咗少少跌幅？咁就真係要專家解吓畫Lu！
余若薇又勁跌，呢樣就一啲都唔奇嘞！因為《大長今》收得，晚晚黃金時間啲師奶移情別戀，一早封咗主角李英愛做新偶像，咁就攤分咗余若薇好多家庭主婦票！等到套韓劇播完，余若薇就自然會升番嘞！
一時嘅浮沉，唔係永恒，最近全球氣候反常，加南亞海嘯，民意情緒波動大，癲癲得得，自然唔出奇！話唔定現時做個民意調查，江主席喺港人心目中嘅民望，重高過楊利偉，排名僅在小泉純一郎之後㖭，天唔對，地唔利，人不和，咁嘅時勢嘅民意測驗，好似盞交通燈燒咗灰屎，斬紅斬綠，又點可以作準呢？
傳真︰2623-9278
電郵︰