利華古遜隊長兼後衞路禾尼喺上周六對紐倫堡整斷左膝韌帶，搞到要提早收咧；雖然會方話佢可以喺下季復出，但小道消息就話佢從此要掛靴。
啱啱喺上個月滿三十一歲嘅路禾尼喺○二年四月對曼聯場歐冠盃整斷左膝韌帶，唞咗成九個月先好得番；點知喺德甲聯復出對科特布斯，好唔好彩又觸傷舊患，結果要唞多七個月。
由於路禾尼同一個地方重創兩次，所以當時有人覺得佢要提早收山；但佢憑着打不死嘅精神，終於喺○三年十一月復出跟球迷見面。
路禾尼雖然第三次斷同一條韌帶，但佢重好樂觀，話可以喺下季重返球場比賽兼踢到四十二歲。之但係，我求大俠收到風利華古遜方面唔係咁諗，事關佢頭尾斷過三次，就算駁番都有再斷可能。
紐卡素前鋒舒利亞喺禮拜日對車路士場英足總盃上，喺一次攔截之中令對方左後衞布歷治斷咗足踝，兼且要提早收咧；事後舒利亞去醫院探布歷治，順便同佢道歉，但布歷治就好豁達，無怪到佢，淨係問佢攞件波衫補數。布歷治咁有容人之量，希望佢快啲好番啦！
講開車路士，最近佢哋問題多多，除咗多球員受傷，年輕右閘格連莊臣因超速超載被罰停牌一個月。過往好多球員因貪一時刺激，搞到前途盡毀，甚至冇咗條命；而且，車仔領隊摩連奴向來要求球員喺場外場內都守紀律；如果格連莊臣重想喺車仔踢波，應好好反省吓！
貝迪斯目前已進佔西甲聯賽榜第三位；球員們就希望會方應承，如真以前四名完成今季聯賽，可以出「雙糧」。其實𠵱家佢哋只領前第七位嘅愛斯賓奴三分，重有西維爾、維拉利爾等同佢哋爭，隨時都會跌番落嚟，會方唔怕應承住先；而且真係可以打歐冠盃，財源滾滾來，都抵畀吖！
利物浦領隊賓尼迪斯最近向基維爾身邊人，包括佢經理人及澳洲國家隊教練費連拿作出炮轟，叫佢哋唔好再唆擺呢位澳洲中場離隊。咁又係嘅，𠵱家「利記」唔夠人用，基維爾又嗌離隊的話，今季真係無希望。但基維爾今季喺賓帥麾下水準大跌，要怪人不如怪自己唔識用佢啦。
逢周一至周五見報