噚日係二月二十二日（星期二），剛好係梁家傑Alan牛一，不過，做咗議員就身不由己。Alan噚日一早八點幾就坐咗入立法會開會，一直開到中午，先至返到辦公室。
佢同八方講，今晚會返屋企同啲仔女切生日蛋糕食，之後同老婆去街食飯，實行二人世界撐枱腳，唔知係咪順便預祝元宵佳節。
八方問佢有乜生日願望，佢話「希望身體健康啦!」重有佢最想可以保持到一周游五次水，有啲運動，過年前只係游到兩日半；至於陪屋企人，佢嘅底線係一周唔多過三晚出外食飯，不過，有時都做唔到，屋企小朋友都有啲投訴啦，冇法。
梁家傑話做議員最唔同係困身，以前打完單案，下晝可以去淺水灣飲番杯茶，但係𠵱家冇呢支歌仔唱，目前佢將六分一時間用嚟打案，其他都畀晒立法會。
梁家傑屬狗，雙魚座多性情中人，煲呔單西九遇着佢，都唔易搞，Alan話，唔使急，先搞清楚公私合作指引，然後先至睇吓政府又冇犯規，大狀即係大狀。
（圖）梁家傑噚日牛一都冇假放，成朝去咗立法會開會。
傳真︰2623-9278
電郵︰