煲呔做足父母官角色，呼籲市民生多啲細路，又話要引入精壯單身漢為港女撮合姻緣。八方翻查立法會資料，發現多數議員生育數目都未達煲呔最少三名嘅指標，十三人一個夠晒數，二十個只生兩名，只有十四個生夠三名，新界王發叔劉皇發最勁，生夠五個，巧合嘅係冇議員生四個細路（見表）。
立法會六十個議員當中，十二個膝下猶虛，民主黨主席達仔唔聽煲呔支笛，佢話，同太太陳樹英商量過家庭計劃，決定唔會生育，因為兩人都要專注公務，八方問佢咁咪好大犧牲？達仔話唔可以咁講，因為重有其他主觀因素。
議員當中雲英未嫁或單身亦唔少，包括嫻姐、蔡素玉、吳靄儀同譚香文等，佢哋個個都咁忙，唔慌有時間拍拖，煲呔話要幫香港女性搵對象，唔知有冇興趣為幾位女議員做媒呢？
經煲呔一講，中環政經界人人大講生仔經，馬時亨話已有兩個女，再生多個隨時家變，造人任務留畀兩個女好啲，工聯會鄭耀棠話屬下三十萬名會員中，唔少已經六十歲過外，想生仔有心都未必有力，佢又話生仔係私人決定，唔到政府話事，暗指煲呔攞嚟講，發叔則話新界人思想傳統，要追男丁繼後香燈，而且要人幫手耕田，所以佢生足五個，但佢啲仔女已經量力而為，大仔生三個，細仔只生兩名，佢重話，如果想後生多生產，政府就要派錢。
傳真︰2623-9278
電郵︰