人稱黃中指嘅黃宜弘執番個政府帳目委員會主席嚟做，今日會公布任內第一份報告，但黃中指卻一改以往帳委會主席召開記者會交代報告做法，唔會見記者，有帳委會成員對此缺乏透明度作風頗有微言。
今日份報告焦點係愉景灣事件同英基學校管治問題，據聞由於帳委會捉唔實當年負責愉景灣發展嘅鍾逸傑痛腳，故唔會點名批評官員，亦唔能追回補地價，至於英基則牽連廣泛，前教統局局長羅范椒芬都走唔甩要上身。
噚日中聯辦酒會，八方碰到特首熱門候選人李國章，佢叫大家唔好計較煲呔同唐唐邊個高分同低分，因為「求學不是求分數」，唔使計呢啲嘢。
上星期評煲呔有九十分嘅賭王，噚日就封晒口。大蛇鍾士元講得重好笑，猛話自己唔識邊個叫做當奴，又話「唔使急，應該慢慢嚟，重有兩年時間。」駐港外交部阿頭楊文昌亦唔肯表態支持邊個，「只要大多數人接受，中央政府就可以接受。」真動聽。
傳真︰2623-9278
電郵︰