時時都喺電視度教香港人認識愛滋病嘅衞生署李瑞山醫生，佢噚日主持每季愛滋病最新情況記者會時，最後一幅幻燈片竟然寫住「Goodbye」呢個咁傷感嘅字眼，因為佢之後會加入中大由沙士英雄沈祖堯領導嘅防疫中心做研究。
其實李瑞山喺十幾年前，已經喺伊利沙伯醫院，同楊永強搞對抗愛滋病，後嚟去咗衞生署做開荒牛，𠵱家愛滋病嘅呈報同分析等等資料，都係佢系統化嘅。
好多年前，計劃喺九龍灣麗晶花園興建包括愛滋病門診嘅健康中心事件，令佢最感到沉痛，因為居民大力反對，事件糾纏咗六年，當年佢有份同居民協商；此外，十幾年前有個牙醫話自己有愛滋病，引起極大爭議，佢喺嗰時冇互聯網情況下，要搵外國嘅感染控制參考資料，搞到佢好𢱑頭；後嚟又有血友病愛滋學童喺社會壓力下唔返得學，所以李瑞山醫生，真係經歷咗一段好重要嘅香港愛滋病歷史。
傳真︰2623-9278
電郵︰