喺無綫主持咗十二年婦女節目《都市閒情》嘅鄺佐輝，原來最近唔聲唔聲俾《都市》飛出局，噚日馮仁昭打電話慰問鄺佐輝，佢好冇心機咁話：「台慶之後因為要做《香港直播》，《都市》cut淨半個鐘，可能因為要減成本，所以我同朱維德、溫裕紅同鍾沛枝四位主持都冇得留低。我喺無綫二十七年，連埋《婦女新姿》一共做咗十五年半婦女節目，我自問咁多年對公司盡心盡力，又冇犯錯，𠵱家飛咗我，我個心梗係好唔舒服啦！」
鄺佐輝又話：「最唔開心係公司叫你走就走，好似用完就掉咁，完全冇乜歡送儀式，或者同觀眾交代。除咗《都市》監製之外，冇人慰問過我一句。雖然間中我都有拍劇，但原來我調離咗《都市》，戲劇組好多同事根本唔知，又唔敢搵我做嘢，公司又冇新嘅工作安排，到時我做唔夠騷，公司又大條道理唔同我續約！我𠵱家就好似企喺十字路口，唔知點算！」
徐熙娣（小S）、羅志祥（小豬）同徐熙媛（大S）噚日喺台灣錄影節目《娛樂百分百》，小豬忙住澄清同女子組合S.H.E成員Selina嘅關係之外，重好同情周杰倫嘅舊愛蔡依林㖭。大S就爆響口話新年喺機場撞到同周杰倫一齊去日本玩嘅設計師阿杜，但係就冇諗到原來侯佩岑都有去。
范曉萱噚日喺將軍澳電視廣播城接受《香港直播》訪問，講到佢隻新碟係喺兩年前開始寫作，亦係反映當時心情，佢嗰時嘅感覺係「無奈」，佢用國語話：「兩年前真的是低潮，當時要看醫生吃藥，現在好多了，因為自己不想再這樣，旁邊的人很痛苦，多得身邊朋友及媽媽鼓勵。」
林百欣日前病逝，佢生前好友紛紛去林伯喺九龍塘嘅住所上香。噚日朝早十一點左右，譚炳文一支公去探訪林伯遺孀之一余寶珠，大約半小時之後，李香琴同楊紹鴻就坐好友關菊英架車嚟到，琴姐重落車示意工人開閘。
另外，林伯養子林建康夫婦噚日亦都有嚟慰問余寶珠。
陳海琪主持《香港直播》三個月，最後都係做唔耐，今個星期五係最後一日，佢臨走前實行大晒冷，今日搵劉德華、梁詠琪做嘉賓，聽日就搵葉蒨文、朱孝天做嘉賓，最後一集就搵譚校長撐場。噚日喺將軍澳電視城見到海琪，問佢功成身退有冇唔開心，佢話：「冇，一啲傷感都冇。」
