何鴻燊公開挺曾，話明曾蔭權值九十分、唐英年值八十八分，對梁振英不予評分，於是搞到曾司長在立法會話：「想壞心腸。」
陶傑話中國人興見光死，阿一未退位，啲阿二阿三就急於表態想上台嘅，幾乎一定玩完。古代太子唔敢出聲，現代嘅「同志」，只要稍為接近皇帝權力中心嘅親密戰友，例如彭德懷、劉少奇、林彪、胡耀邦、趙紫陽等，都會含恨而終。北京未有表態、欽點之前，伸個頭出嚟，係好危險嘅動作。
不過中貿Ｋ另有想法，佢諗到既然香港冇特首普選，不如用另外一個方法。佢從馬英九表態有意競選國民黨主席得到靈感。連戰未話唔做，馬英九就表示有意，先發制人，搞到最大對手王金平不知如何是好，跟住台灣報紙立即做民意調查，馬英九大幅度領先，你話連戰、王金平點算好呢？
中貿Ｋ話：「不如我哋公開表態，支持唐英年，左丁山你又搵一班人表態，公開挺李國章，話唔定支持梁振英嘅人士唔抵得，恐怕執輸行頭，立即跳出嚟表態挺梁……然後搵鍾庭耀或者王家英做個民意調查，睇吓邊一位（曾、唐、李、梁）最受香港市民支持。嗱，如果係曾司長排第一，北京欽點他人之時，總有啲顧忌，可能真係捧曾司長做第三屆特首呢！呢條橋叫做變相直選特首，你明白未？」
既然人人表個態，咁就未必限於曾唐李梁嘞，話唔定可以抬十個八個人出嚟初選，十分熱鬧。表態支持特首候選人唔係大闊佬嘅專利，大家唔好執輸噃。不過回心一諗，中央會怕表態太多，會失控，遲早都會在背後叫闊佬們閉嘴。