雖然澳門賭業股熱潮已減退好多，但龍頭股如新濠國際（200）同信德（242）股價仍然硬淨．就算唔知注唔注入賭牌的嘉華建材（027）亦企得好硬。
經紀陳問小初，記唔記得上個月初，結好控股（064）批股畀華置（127）老闆同賭王四太後，股價炒到飛起一役？當時市場憧憬班大孖沙入局，必有後着，可能同濠江有關，股價由唔夠2元炒到上去最高5元，據聞有人趁高獲利，令股價幾乎打回原形。
經紀陳話，結好今次又向老闆同埋大劉等一班大孖沙配售可換股票據。結好今日復牌，唔排除會炒風重現。
結好喺個幾星期前，股價突然急升兩成幾後停牌，原來係向大孖沙發行2億元的可換股票據，票據換股價1.80元，較停牌前收市價1.88元有4.26％折讓。
雖然結好今次又有大動作，但小初就認為今次唔會有上次咁熱鬧，因為好多散戶甚至炒家重坐緊艇，而且見過鬼怕黑，有冇人肯跟亦係一個疑問。
慕容小初