台灣第一名校「國立臺灣大學」嘅教授嚟到香港開會，香港主辦單位一定以「台灣大學」教授嚟介紹佢，刪去「國立」兩字，自然亦以「台」代「臺」，其他國立政治大學等等亦遭一同對待。左丁山曾經問過Ｗ教授點解唔可以正式介紹之為「國立臺灣大學」？Ｗ教授苦笑云：「政治正確也；實際上唔係幾通，只會益咗陳水扁？」
點解呢？Ｗ教授解釋：「國立者，中華民國國立也，稱之為國立臺灣大學，與國號有關係。陳水扁民進黨大搞去中國化，以前又講又做，現在學乖咗只做不講，靜雞雞咁一於將中國兩字除去，『中國造船』可能會改為『台灣造船』、『中國鋼鐵』改為『台灣鋼鐵』，北京周圍去封殺，特區政府指示要政治正確，稱『國立臺灣大學』為『台灣大學』，正中陳水扁下懷，方便佢去中國化㖭！」
呢啲事情真微妙，海峽兩岸鬥法，奇招盡出。台灣方面，台北市長小馬哥曾經想為台北市集資搞基建項目，發行市政府債券（如香港特區政府債券、五隧一橋債券），邀請香港啲國際投資銀行去pitch（競投）做發行商。呢筆生意本來幾好做，但竟然冇人肯去台北爭生意喎！有錢賺都唔制？梗係啦，第一波士頓為台灣財政部做deal，俾北京冷淡對待咗好耐，生意邊處多點呀？唔使講都係大陸嘅國企民企，所以香港啲國際投資銀行唔敢得罪北京，情願捨棄台灣方面嘅政府生意，只做台灣私人企業生意。
世界就係咁現實嘅，如果小馬哥能夠當選國民黨主席，問鼎總統寶座成功一挫民進黨台獨氣燄嘅話，北京或者會稍為放鬆對台灣嘅壓力，不過國民黨青黃不接，中生代無人，你話小馬哥輸咗，選個老波骨王金平出嚟，民進黨人再入主總統府嘅希望係百分百。