近排冇焦點新盤開賣，一手市場冇乜方向，地產代理就四出搶獨家盤𢱑銀。好似代理集團美聯物業，手頭有二十個樓盤做緊獨家。噚日重嗱嗱聲喺新世界發展手上，攞咗元朗蝶翠峰嘅代理權，屋苑剩低唔夠五十個單位，呎價二千三百幾。
勁敵中原集團，都唔輸蝕，手頭有十七個樓盤做獨家，噚日重攞到新鴻基地產嘅土瓜灣農圃道十八號代理權，算係近期獨家盤中，售價較高嘅一個。港島區就有裕泰興西環翠麗軒，新界區有元朗悅富豪苑。好耐未有推盤嘅百利好集團，早排都將黃大仙單幢盤百利軒，畀中記做獨家。
若以發展商計，中原獨攬裕泰興嘅樓盤，美聯就係華懋集團物業唯一銷售代理。
發展商所以將樓盤交畀單一代理行，無非想盡快清貨，兼且代理會自行做市場推廣，又可慳一筆，何樂而不為。不過通常畀單一代理獨家嘅，以貨尾或規模較細嘅樓盤居多。
各地產代理行嚴陣以待，預備九龍站上蓋嘅凱旋門豪宅開賣。美聯物業噚日就舉行凱旋門誓師儀式，逾千員工出席外，重上演一場魔術把戲。
兩名主區主管身穿華貴晚禮服，帶同區內同事，利用魔術帽表演，變出凱旋門八大賣點，以輕鬆手法介紹呢個矚目豪宅。雖然重未賣得，但美聯執行董事陳坤興就預先送上水晶地球，畀凱旋門銷售話事人雷霆，寓意樓盤為世界級豪宅，全球享負盛名。
農曆新年期間，屋之島物業顧問行休市，年初七至正式開工，不過，住宅部執行董事歐志康話，因應客戶要求，休市期間同事都會繼續提供服務，好似年初三已經有客要求睇樓，以外籍人士佔多。
歐志康透露，個外籍客原本已經租咗地方，諗住嚟港就可以入住，但後尾出咗問題，要嗱嗱聲搵過第二間，同事帶佢睇西半山雍景臺，落實以三萬四千五百蚊，租咗個千三呎單位，屬市價。成為公司雞年第一名客戶。
歐志康話，公司今年開第一張單時間比舊年遲，可能係今年冇設開單利是，同事少咗啲動力鼓勵啩！
國際財經雜誌亞洲貨幣，每年都會搞唔同嘅選舉，而喺「最佳管理公司」讀者評選中，信和置業就擊敗六十一個對手，奪得「2004年最佳整體管理進步公司」獎，重係第一次攞呢個獎㖭。
評選係邀請亞太區著名基金管理公司、對沖基金同紀經行嘅資深財經人員做評選團，以獲提名公司過去一年喺企業策略、財政管理、年報資料、股東價值關注、經營效率、投資者關係同網址內容等七項做評分準則。
長沙灣半山嘅郝德傑山，環境幽靜，四周樹木多。自從物業對面，以法國古堡式建築做藍本嘅嘉珀山落成後，區內先至多番少少人氣。男歌手李克勤日前入市郝德傑山後，有消息講，藝人郭靄明同埋夫婿劉青雲，噚日亦慕名去睇樓，但就未有扑鎚。
郝德傑山僅七十二伙，屬中低密度小品式新盤，唔知係咪因為嗰區比較清靜，唔少藝人明星都鍾意，好似影帝周潤發，就買咗個嘉珀山。
農曆新年期間，本港一手市場交投淡靜，但內地就完全唔同，祈福集團兩個內地盤，喺唔夠半個月內套現一億六千五百萬。
番禺祈福新邨「曉峰園」，喺本月頭十三日，共賣出二百幾套洋房，總值一億三千萬；而南海祈福南灣半島嘅「水岸洋房」，銷售總值都達三千五百萬。
另外，中原（中國）李勁峰表示，廣州南沙濱海花園喺年初四開市，共吸引過百港人睇樓，首二十套單位即場賣清，總值逾八百萬元人民幣。當中七成買嚟做投資，其餘計劃作度假之用。
電郵地址：
