內地演員好戲　憂港星飯碗不保
秋生腰患未癒舞刀嗌救命

陳冠希、范冰冰和黃秋生在上海拍攝電視劇《八大豪俠》，秋生因腰傷舊患，拍舞刀戲後叫苦連天。他又讚內地演員范冰冰好戲，並為香港演員擔心，若不努力很快會被內地演員取替。

陳冠希、黃秋生、范冰冰和陳子聰目前在上海勝強影視基地拍攝由王晶執導的電視劇《八大豪俠》，秋生飾演豪俠首領閰鐵心，埋位前他已苦練幾套絕世刀法，曾練習大聖劈掛的秋生拍了幾場舞刀戲後，大叫「救命」。

十幾年前傷腰骨
秋生笑說：「幾套刀法當然難唔到我，但係因為十幾年前拍動作戲整傷腰骨，以前唔識愛錫身體，拍戲一日五組，晚晚捱通宵之餘重成日喺車廂瞓覺，成個人就好蝦公咁縮埋，腰患愈嚟愈嚴重，𠵱家點補救都冇用，舞刀太耐腰骨就痛。」
秋生又大讚首次接拍古裝電視劇的陳冠希及內地演員范冰冰表現好，他說：「佢（指陳冠希）腦筋轉得快，佢中文唔好，記劇本有難度，但好聰明，演戲亦好有天份！而內地演員好專業，好有交流，佢哋大部分受過正式演技訓練，同范冰冰演過兩場戲之後，我真係為香港演員擔心，如果唔努力嘅話，好快會畀內地演員取替。」

陳冠希又屙又嘔
當秋生和陳冠希拍攝在屋頂互訴心事的戲份時，因需爬鐵架到五層樓高的屋頂，秋生叮囑陳冠希戴上手套說：「天氣凍又乾燥，唔戴手套雙手一定遭殃。」爬上屋頂後，陳冠希盛讚風景迷人，更叫助手爬上來欣賞，令助手十分擔心。
此外，陳冠希開工時因食物中毒又屙又嘔，秋生遂吩咐影城唯一的餐廳特別煲白粥給陳冠希清腸胃，幸兩日後陳冠希的病情好轉。