下屆特首熱門人選當奴，趁人氣旺，乘勝追擊，竟然在電台呼籲港人狂生仔！
當奴掌管過人口政策，知道好多內情！梗係喇，十年來大陸新移民不斷殺入，廢董班子面對每日一百五十個名額，毫無審批權，唔會無後果。
廢董禍港七年，搞到通街負資產，港人做愛次數，遠遠墮後！梗係喇，成日聽見好似催眠咁講：中國好，香港好，香港好，中國又好。夫妻又何來性趣？
香港人唔肯生，大陸一聲唔該，加緊新移民輸入，乜嘢叫「香港人」？經過咁多年新殖民主義，港人身份早已不明！香港人成份珠江三角洲化，唔怪得俾人話淨係鍾意伸手攞綜援，煲呔有見及此，知道唔對路，叫港人生多啲，維持番七十年代獅子山下嗰隻種，都啱嘅！
不過就算香港狂收新移民，啲大陸佬都開始唔嚟lu！每日一百五十個配額，竟然開始有得剩，證明珠三角人民，眼睛雪亮，除非唐唐宣布，下個財政年度，將失業綜援增加一倍，否則香港人工低，租金貴，與其排隊攞單程證，不如儲筆錢畀蛇頭，橫渡太平洋，去美國投靠布殊好過！
以前就拚生拚死，游水都要偷渡，現時大陸新移民都用腳投票，臨近深圳河而窒步，當奴呼籲港人生多啲，得！除非廢董提早落台，全城狂歡，若然佢今日宣布退休，由當奴署任，咁今年十二月，就將會成為特區BB搶閘出生嘅高峯期嘞！
話時話，失業率開始下降，會唔會都係歸功於當奴佢身為政務司司長，領導政府有方呢？當奴咁係咪有資格提早接班先？起碼Acting吓，捱到二○○七過吓癮！或者當奴搶先公布特首政綱：佢做咗，港人生第一兩個仔免稅，生第三四個仔，政府每位送獎金五萬，男女嬰同價，生到第五六個呀？不止獎金重有奶粉學費，同埋政府津貼三餐直到二十一歲為止！咁全港市民，瘋狂做愛，流香港血，飲香港奶，復興香港人，用一個前所未有嘅BB潮，來迎接當奴登基大典囉！
傳真︰2623-9278
電郵︰