英國萬人迷碧咸（DavidBeckham）嘅老婆Victoria，由於星期日凌晨突然作動，所以喺朝早五點半入院，喺十點四十分成功誕下重七磅二安士嘅第三仔告魯斯（Cruz），雖然呢個BB早產幾日，不過醫生話佢一切正常，應該三至四日就可以同媽媽一齊出院。
碧咸夫婦幫BB改名叫告魯斯，令唔少人感到出奇，皆因呢個名喺西班牙文解作十字架，而且係女仔名，一個牛津大學西班牙語導師話：「我覺得呢個名好戇居，呢個係一個老土嘅女仔名。」有報道重話碧咸夫婦曾經想幫個仔改名做Jesus。
可能因為個名怪得滯，所以博彩公司威廉希爾都冇開到呢個名嘅賭盤，而佢哋前晚即刻開咗告魯斯代表英格蘭國家隊嘅賠率係一百零一倍，如果佢哋三兄弟一齊踢國家隊就一千零一倍㖭，不過有占星術專家預測告魯斯長大後會成為一個畫家。
碧咸第三次做爸爸當然開心，佢重話BB嘅鼻同口唇似媽咪，而碧咸兩公婆嘅父母同其他親人都相繼去到醫院睇BB，不過大家都喺兩個鐘後離開，剩番碧咸同Victoria阿媽積琪（Jackie）留低。由於今次係Victoria第三次剖腹生產，所以比前兩次危險，醫生表示Victoria可以懷第四胎，不過危險性就會增加。