自從兩年多前喺科羅拉多州鷹縣犯下強姦案後，拜恩每次到丹佛比賽都俾當地嘅球迷噓，現在高比仔雖然已經被判冇罪，不過丹佛嘅球迷依然唔放過佢。好似喺明星賽前介紹球員出場時，拜恩就係全場唯一俾觀眾喝倒采嘅球員。
明星賽前奧尼爾成日寸姚明，話佢成為明星賽票王全靠中國呢個大票倉，但係一落到場兩個就老友鬼鬼，互相擁抱，打緊波時重不斷吹水，完全冇隔夜仇。相反，奧尼爾同拜恩呢對前隊友就真係完全冇偈傾，兩個人唔單只冇向對手握手，而且全場話都冇一句。
重記唔記得奧尼爾噚日公開展出嘅「鞋底電話」？當時小記心諗邊個會咁儍對住鞋底講電話，點知噚日喺明星賽上，場邊就有人用「巨無霸」個鞋底電話，而且呢個唔係普通人，佢就係HipHop天王兼時裝界巨子PuffyDiddy，原來愈騎呢嘅嘢就愈受歡迎。