中國企業協會噚日搞新春酒會，老董、唐唐、詩姐姐同好多官當然要畀面。除咗佢哋之外，廉政專員黃鴻超同埋唔少廉記人都有嚟到。唔知黃鴻超係咪響應老董「堅決反對官商勾結」嘅呼籲，特登嚟酒會徹查一吓？
黃鴻超一聽到八方咁問，就話「唔好成日講呢啲口號啦！」佢同八方澄清，廉記咁多人嚟，因為大家有合作。佢又認請緊調查主任，不過就唔係因為董特首成日叫人向廉署舉報官商勾結，只係填補流失咗嘅人手啫。
八方後嚟撞到唐唐，問佢低分過煲呔兩分會唔會唔高興啦，唐唐就笑晒口咁話：「我淨係諗全心全力做好目前嘅工作。」有行家戥唐唐唔抵，提議佢搵賭王解釋吓，唐唐就話：「八十八分已經好高分啦！」有啲行家又雞啄唔斷咁追問：「攞八十八分就滿足嗱？重爭十二分喎，使唔使查找吓不足？」唐唐又係搬番句「我淨係諗全心全力做好目前嘅工作」。唐孖八呀，講嘢俾啲創意好唔好？
傳真︰2623-9278
電郵︰