紐記嘅荷蘭前鋒古華特累街坊！皆因禮拜日佢個入波，累到車仔領隊摩連奴少咗四冠王份獎金，分分鐘唔見幾千萬港元！你話係唔係阻人發達？
歐洲嗰邊買車路士贏波或囊括四大冠軍嘅波友，同樣因為佢呢一腳而冇得收錢。最㷫嘅係立博個發言人重講風涼話：「好彩有古華特，如果唔係要賠成千萬英鎊，真係應該封佢爵。」預料歐洲賭博公司當晚慳番逾億港元。
車路士場波亦係足智彩今季首個大熱倒灶嘅奪標賠率，喺佢地輸波後，威廉希爾賭博公司即刻「抽水」開出「四大皆空」賠率，有成二十一倍；而聯賽盃輸波夾歐冠聯出局嘅孖寶賠率亦有六倍。
最黑仔嘅重有車路士個門將古迪仙尼，原來領隊摩連奴早前「欽點」佢打聯賽盃決賽，重諗住畀埋個隊長佢做。點知佢前晚喺九十分鐘被趕咗出場，如果上訴失敗，想威都冇得威。
好多球迷都覺得英超球員踢波茅柴，日前意大利《米蘭體育報》做咗個四大聯賽犯規統計，結果顯示平均每場犯規次數最多嘅係意甲，有四十二點四次；英超只得二十八點二次，排四大聯賽之末。而英超每場波有二點五張黃牌、○點一四張紅牌，仍然係最低嘅，而最高嘅又係意甲。
AC米蘭王牌舒夫真高前日完成顴骨癒合手術出院，家陣同時間競賽，希望對唔到曼聯場首回合、米蘭打吡戰，都踢到對曼聯場次回合。AC實驗室已準備一個好特殊、據講有啲似當年加斯居尼踢拉素時用過嘅面具喎，大家準備睇舒夫真高呢個「鐵面王子look」都得嘞。
車路士向前英國國家田徑隊埋手，聘請英格利殊擔任新隊醫至季尾；而據聞呢位醫生最擅長係令運動員嘅傷勢迅速康復，英國女跑手賀姆絲去年奧運會攞八百同千五米金牌，全靠佢短時間治理好腳傷。車路士棄用前首席隊醫費沙，有傳同洛賓受傷有關，此舉想盡快醫好洛賓？
曼聯係世界上最富有嘅球會之一，不過對於推動女足就一向唔及其他英超大球會阿仙奴同埋車路士等；而喺日前，佢哋重宣布為咗加強青訓，今屆球季結束後將會取消女子隊，只會培訓女球員至佢哋十六歲為止！唔通因為佢哋見搞女足咁耐，都唔夠阿仙奴勁，索性將女足摺埋？
逢周一至周五見報