香港社會服務聯會噚日舉行第三屆「商界展關懷」嘉許禮，表揚香港商界熱心參與社會事務，扶助弱勢社群，有六百七十九間機構得到「商界展關懷」嘅Ｑ嘜。
社聯噚日又即席搞咗個政府、社福界同商界三方論壇，傾吓大家可以點合作。社聯主席陳智思話，商界將工序北移，有份造成今日咁多市民失業，有責任幫吓社福機構。財爺唐英年就提醒香港嘅納稅人，唔好以為交足稅政府就有責任解決所有社會問題，皆因香港稅率其實係好低。
滙豐銀行主席艾爾敦就話，商界存在嘅目的都係為咗賺錢，世界上邊有破產公司會捐錢畀社福機構？不過佢都認為愈來愈多打工仔鍾意喺關心社會嘅機構做嘢，如果商界做多啲善事，員工開心啲，公司就有錢賺、有錢捐，實行一團和氣。
講番噚日嘅嘉許禮，《蘋果日報》有幸連續三年成為其中一分子，等八方報告吓《蘋果》慈善基金嘅情況啦。基金成立踏入第十年，舊年撥咗三百五十萬資助一百二十二個社會服務機構嘅項目；又發放咗一百二十萬助學金畀三百三十二個品學兼優嘅窮苦學生。基金成立以來，得到好多讀者善長長期支持，八方祝大家雞年行好運，《蘋果》基金嘅善款都滾滾來。
（圖）滙豐銀行主席艾爾敦（右二）噚日喺財政司司長唐英年（左二）手上，接過社聯頒發嘅商界展關懷大獎；左為社聯主席陳智思，右為社聯行政總裁方敏生。
張家俊攝
傳真︰2623-9278
電郵︰