個市欲跌還升，且係高收，雖然恒指只係進帳得23點。本周五期指結算，結算前估計拉鋸，見高咪追，見低則買貨。
中企C輪4545：國指升8點，上到4932，升幅雖然細眉細眼，但有啲中企指數C輪好養眼，例如3755與4536分別彈上13%與14%。兩隻輪交投平淡，唔係好作得準。不過最熱門嘅3782，成交金額17球以上，升幅亦達8.5%。睇嚟，國企股可能會有勢，中企指數C輪升定嚟等。
3782喺7月尾夠鐘，輪價12.7仙，溢價9.3%，槓桿率35.3倍（有效11.8倍），引伸波幅21.4%。雖然有爆炸槓桿率，而壽命亦都唔算短，但要畀到近1成嘅溢價，唔多化算，除非認為國指會彈得非常厲害。
當國指會升，而幅度溫和，要揀嘅對象應該係4545，4月尾夠鐘，輪價14.9仙，溢價1.2%，槓桿率10倍（有效7.6倍），引伸波幅31.3%，呢隻實際好多。
中信C輪4483：中信泰富（267）收22.40元，升0.15元，個勢靚，C輪諗得過。
中信C輪小貓三兩隻，有成交嘅得4件，冇成交嘅有兩件，最活嘅係3817，9月到期，輪價45.5仙，溢價9.6%，槓桿率4.9倍（有效3.2倍），引伸波幅58.5%。
另1隻4483，10月到期，輪價20.5仙，溢價2.4%，槓桿率10.9倍（有效6.7倍），引伸波幅24.3%。兩隻都係標準輪，4483每1項條件都靚過3817，要買，梗係4483。
聯想與聯通C輪：恒指成份股最醒嘅係聯想（992）與聯通（762），升幅4.6%及4.5%。咪打佢哋C輪嘅主意，兩公司C輪數據冇隻靚。想做淡嗰邊，亦唔得，因為冇P輪。
章盛