官恩娜同吳卓羲近排一齊拍緊無綫新劇《酒店風雲》，佢哋喺劇中扮演情侶，不過馮仁昭聽聞佢兩個因為合作而撻着咗，早幾日吳卓羲同官恩娜喺中環拍完外景，男方做埋柴可夫送官恩娜返屋企，有周刊重影到佢哋嘅車廂親熱照㖭。
官恩娜曾經話過希望踏入雞年後行桃花運，家陣真係如佢所願，話咁快就有緋聞，啱啱喺馬來西亞做完許冠傑演唱會嘉賓嘅官恩娜，噚日一落機知道傳佢同吳卓羲擦出愛火花後，佢即時猛嗌好驚好驚，不過言談中就聽得出佢對吳卓羲印象好好。
官恩娜讚吳卓羲靚仔，又係無綫新人王，重好有風度，亦確曾送過佢返屋企，但佢強調冇同吳卓羲喺車上親熱，可能係角度問題引起人哋誤會。至於有冇發展機會，官恩娜就話：「我冇諗呢啲嘢，新人做第二年重難行，我想要事業先，拍拖咪搵自己嚟玩！我想要嘅桃花係講人緣方面，唔係愛情呀。」
雞年伊始，娛圈新戀情傳個不停，拍拖都係好事嚟，唔知官恩娜同吳卓羲會唔會由唔係講到變係吖嗱？
鄭希怡（Yumiko）前晚出席英皇派對，馮仁昭問佢之前有機會同偶像周星馳一齊出席活動係咪好興奮，Yumiko就話：「嗰日係我第一次見到星爺，我好鍾意佢做嘅戲，我部電話嘅鈴聲都係用佢把聲。」Yumiko又話冇諗過同星爺傳緋聞，只係當對方係偶像咁崇拜啫。
周麗淇日前出席第六屆奧比斯「步步獻光明」慈善步行活動，大會重特別幫周麗淇設計咗一對模擬嘅視障眼鏡，戴咗之後可以測試視力，周麗淇話：「眼前一片白濛濛，唔使一分鐘就覺得唔方便，我可以了解到失明人士平時生活係幾咁艱苦。」
周杰倫承認同台灣女主播侯佩岑拍拖，重話從來冇同蔡依林（Jolin）一齊過，有報道話吳宗憲證實周杰倫同蔡依林拍過拖，但吳宗憲大喊冤枉，佢話當初只係介紹蔡依林畀周杰倫識，諗住撮合佢哋，但佢哋係咪拍過拖就唔知喎。另外，蔡依林經理人話蔡依林唔會上侯佩岑嘅節目宣傳將推出嘅新書，但強調係公司安排，並唔係蔡依林要求。
鄭伊健、林嘉欣主演嘅《後備甜心》喺下個月上映，鄭伊健喺戲入面同林嘉欣、陳文媛都有親熱戲，林嘉欣𠵱家已是鄭伊健好友陳光榮嘅女朋友，問佢同林嘉欣拍親熱戲時，會唔會尷尬，鄭伊健就話：「唔會，大家係演員，專業嘛！點會尷尬。」
