老友從溫哥華回港度假，一落飛機便大喝一聲：「有咩好嘢食?!」
由於在港逗留日子有限，食一餐少一餐，所以每一餐都好小心諗去邊度食，費事嘥咗啲quota。晏晝在九龍城街市熟食檔打開食幔，叉蛋飯、牛腩麵、泰式辣雞腳、炸兩加凍檸茶，一個地方，五個驚喜。
金寶的辣蝦刺身及爆漿蝦丸聞名北美，老友點名要食，兩個人連啖三碟辣蝦，個口一大陣蒜頭味。
大力推介的深圳雞煲及豬骨煲食到老友口不停，品嘗了內地食肆的美味，亦見識了街頭食肆的「獨特」衞生情況，一致認為，若要繼續有福氣享用街邊美食，一定要保持身體健康，大菌食細菌。
連續光顧了佐敦的澳洲牛奶公司及麥文記雲吞麵，澳洲牛奶的蛋治及奶茶配搭獨步武林，整多件油多㖭，肚皮大滿足。麥文記的油菜彷彿有魔法長保青春不老，又甜又爽又冇渣，豬手、牛腩、雲吞長期保持水準，食唔厭！在尖東東亞桌球室打枱波為副，食肥師傅煮的鮮牛肉公仔麵、葱花蛋治及奶油多才是正主兒，「從來未食過咁好食嘅公仔麵，啲牛肉又有牛肉味，啲公仔麵又……鬼咁好味！」老友由衷地說。
三周假期彈指即過，跟老友吃了的地道美食不能盡錄，總之喺之前減咗嗰幾磅賺番有突。「食咗咁多間，最好食邊間？」我問。老友想也不想便答：「梗係你屋企，由你媽媽親手做的愛心山東餃子，邊度都食唔到，好食到咩咁！」
吖，答得幾得體，不枉帶你食咁多好嘢。