公布收購大陸傳媒企業的友利控股（419），自復牌以來一直熱炒，噚日終於停牌搞批股。市場傳聞友利今次以先舊後新方式，每股0.12元，配售6.5億股，集資約8000萬銀。
雖然話就話配售價0.12元，較停牌前收市價0.146元，有近14％折讓，但唔好忘記友利公布收購前係做緊5仙左右，公布收購大陸傳媒生意復牌以來，股價一直升個唔停，所以呢個所謂折讓價，其實唔算便宜。
經紀陳話，今次友利批股並唔係派晒出街，而係集中於個別友好機構投資者手上，所以江湖傳聞友利批完股之後，應該可以頂得住。
另外，澳門賭業股奧瑪仕（959）自希臘神話換股成為大股東後，市場一度有所憧憬，令股價急升，可惜昨日又有可換股票據持有人換股出貨，股價於是大散14.9％，收1.37元，成交股數近1.4億股，金額2.08億元。
小初其實唔明白，點解有人明知公司重有好多票據可以低價換股，仍肯冒咁大風險買入？
慕容小初