自稱周身名牌有人贊助
馮仁昭四圍超：章小蕙買特價YSL戰衣　𤓓

章小蕙憑住喺楊凡執導嘅電影《桃色》度做「美麗」呢個角色，而可以踏足柏林影展紅地氈，實在幸運。佢喺柏林嗰九日，着住唔同嘅靚衫出場，一時YSL、一時JohnGalliano、重着埋Lanvin，完全滿足晒佢「晒衫」嘅慾望。

查詢額外折扣
章小蕙重同記者講此行帶咗幾大篋戰衣，當中有唔少係由各個名牌贊助㖭，認真架勢。佢又同記者話佢喺飛柏林前專程停咗巴黎一日，試着YSL贊助佢嘅紅旗袍。不過據馮仁昭所知，實情並唔係好似章小蕙所講咁，YSL件旗袍並唔係贊助嘅，而係佢自己買嘅。
話說佢當日抵達巴黎YSL店嗰陣，撞啱YSL減價，章小蕙買咗啲嘢，佢喺畀錢時向店員表明身份，問可唔可以再畀額外折扣佢，結果店員經過一輪查詢後，回覆章小蕙上頭指示係「冇得傾」，結果章小蕙惟有好無奈咁畀錢買咗嗰件特價紅旗袍，認真冇癮。

Isabella萬元利是買新鞋
梁洛施（Isabella）噚日為將軍澳一個商場舉行嘅新春活動做表演嘉賓。佢話自己點算過今年嘅利是，發現有近五位數字嘅進帳，佢話：「媽咪同家姐每人都封咗一千蚊，佢哋話好意頭喎。」Isabella表示會將利是錢用嚟買鞋，因為今年佢要負責設計自己嘅形象，唔想一直着短裙，所以會多啲着T恤牛仔褲。

李麗珍戴頭套扮病人
李麗珍前晚幫香港演藝學院「第二屆香港舞台劇界精神獎」做頒獎嘉賓，佢話自己新年嗰陣帶住個女四圍𢭃利是，而自己聽日就會投入拍攝《奇幻旅程》，重會戴頭套做病人，阿珍話：「我飾演癌症病人，同曾志偉做對手戲，套戲要喺郵輪上面拍。」

女生宿舍介紹男仔賀生日
女生宿舍噚日到銅鑼灣同歌迷預早慶祝成員Macy同Toby嘅生日，不過Bella因為腸胃炎又屙又嘔，最後被迫缺席。至於送乜嘢畀兩位壽星女，Elise就即笑笑口踢爆佢兩個好恨拍拖，所以會介紹男仔畀佢哋識，Macy同Toby都坦白承認，Macy重話近排最傷心嘅事就係周杰倫承認拍拖，重話人哋唔襯㖭。

森森惋惜林伯去世
森森、柳影虹同張偉文等人噚日到灣仔舉行慈善音樂會記招，森森、柳影虹都曾經喺亞視工作過，所以對於林伯嘅逝世都覺得好惋惜，森森重話當年同林太不時相約食飯，大家感情好好，不過自從森森搬咗去澳門之後，大家都已經好少聯絡。張偉文就話去年發覺心臟有事，上個月做咗手術之後，𠵱家已經冇事。