渣打（2888）上周三派全年成績表，上周三倫敦收995便士，上周四跌落983便士（最低976便士），上周五彈上1000便士，單日升幅1.7%，係英國富時100指數第4大升幅成份股。渣打近期創出新高，業績理想，但股價即時回落，只係獲利回吐，上周五彈番上去，消化完畢，新高待破，對滙控（005）有好嘅指引。滙控04年估計PE只係略高於渣打，以滙控嘅質哋，應該高啲。
滙控上周五收133.50元，單日升0.50元。去年11月高位136.50元，估計下周一派成績表前後，見新高或破新高冇乜難度。
滙控C輪：滙控C輪，勝在槓桿率一般夠大，正股升一兩蚊，揸滙控C輪已經有魚有肉。搏殺格炒，揀3595、3682、3541。
穩中帶搏殺，始終係4441。滙控上周5日升2.50元，4441只係升得8仙。4441若然跟足正股，上周應升25仙；4441前周打上已經負溢價，理論上應該跟足正股升也。隻輪6月尾到期，輪價72仙，負溢價1.8%，槓桿率18.5倍（有效亦係），咪理引伸波幅。市場上，只有5隻滙控C輪負溢價大過4441，但佢哋好冷甚至冇成交，壽命或槓桿率遜於4441，冇得比。4441表現咁「差」，係因市場流通量大。隻輪由一波發行，去年10月發行量由1億份大增至26億份，11月縮番到16億份，上月又再增至26億份，市場街貨57%。最終負溢價都會收縮，負溢價1%（相對於𠵱家負1.8%）計，都值83仙。平水計，更值0.96元。
和黃C輪：上周五推介嘅和黃C輪3561，𠵱家最新數據係溢價2.3%，槓桿率15.4倍（有效9.6倍），引伸波幅22.3%。6月中到期，輪價46仙，仍然炒得過。
章盛