立法會議員鄭經翰辦事處開幕，煲呔曾及幾位高官畀面捧場，情況熱鬧。做議員好似好風光，但立法會觀察家評論Ｌ就同左丁山講：「今屆啲立法會新貴好似重未進入角色，長毛更加唔肯進入角色。立法會議員工作其實甚為枯燥，就係睇文件、開會、睇文件，講程序，玩政治手腕，按立法會遊戲規則辦事。如果直選議員唔出聲，唔間中出位，搶曝光率，好快就會俾選民遺忘。搶得多嘅話，就似足做騷；做騷太密嘅話，就會俾人鬧，民望下跌。照我睇，鄭大班做議員做得好辛苦！」
辛苦就唔好做咯，橫掂商業電台嘅收聽率自鄭大班離開後，不止下跌，廣告都流失，益咗新城電台（見二月十二日《經濟日報》），不如搵鄭大班返去懾住陣腳，穩住形勢，如果何老先生肯出句聲，評論Ｌ與左丁山都認為鄭大班一定會作出「明智的抉擇」，畢竟做十時前特首好過做范徐麗泰校長嘅學生也（校長叫學生坐低，唔准出聲，學生就要遵命）。評論Ｌ話：「ACNielsen最近報告，話十大受歡迎節目之中，港台佔咗六個。記得有鄭大班壓陣之時，商台有慣性收聽率，由《風波裡的茶杯》計起，鄭丹瑞、查小欣、18樓Ｃ座、陸叔，以至六點新聞報道，都打入十大，邊好似𠵱家咁杰，竟然由晚上十一時嘅節目《光明頂》攞彩㗎！」
鄭大班嘅節目曾號稱一年為商台攞到一億元廣告，以商言商，炒佢實在於理不通。不過現實往往比編劇更加稀奇古怪，外人唔會明白點解。如果倫敦賭波公司開出賭盤，讓人下注「鄭大班辭立法會返商台」，你估賠率會係幾多呢？五百倍還是五倍？