歌星李克勤唔單止唱歌好聽，年初橫掃多個樂壇獎項，最近重同拍檔梁榮忠主持電視節目，個個星期六都見到佢。雖然克勤咁忙，但仍然抽到時間買樓，市場消息話，佢剛剛以八百一十萬，買咗長沙灣郝德傑山一座高層E室，一千二百八十二呎，呎價六千三百幾。
李克勤𠵱家住緊係西貢銀線灣龍湖別墅，同郝德傑山環境好唔同，所以聽講今次買樓，都係諗住用嚟投資多過自住。郝德傑山剛剛上個星期先至開放現樓，重新推售，克勤確實夠眼明手快，唔知同呢排「叮」得人多有冇關呢。
呢區都幾受演藝人士歡迎，除李克勤外，貴為荷李活巨星嘅周潤發，舊年八月，用咗五千萬買入郝德傑山對面嘉珀山一座複式三千六百幾呎。
清水灣道8號成功吸引影藝界人士入市，憑《英雄本色》成名嘅演員李子雄，發展商話佢買咗個高層，呎價大約六千，聽代理講，係廿樓六百幾呎單位。
蘭西下午喺售樓處見到佢，話係陪朋友嚟，自己覺得個價太貴，千五呎單位要八千幾蚊呎，同心目中嘅四千幾蚊貴成倍，又話六百幾呎單位睇落好細。今次入市怕且係朋友決定。
佢重話，早前同朋友合資，買入將軍澳怡心園，最近平手售出，亦係朋友嘅意思，佢今年希望買個大單位自住。
有時為咗要搵個好舖位做生意，真係要夠耐性至得，好似利嘉閣上個禮拜五開張間天后分行，就真係等到頸都長至等到。
間分行係由兩個舖位打通而成。聽講其中一個舖，前租客係同行，同業主一簽就簽咗十年租約，最近約滿搬走，利記即刻搶住承租，跟住重租埋隔籬都係做代理嘅舖，夾埋三百六十呎。
聽講上手租客，係嫌續約加租太勁至唔租，利記畀嘅租金係六位數字，計落呎租最少都要二百八。
睇嚟利記對呢區嘅前景信心十足。
澳門隨着賭業愈來愈發達，樓市跟住熾熱，吸引唔少港人買嚟自用或投資，有啲貴到千幾萬都有，中原分行經理余浩銘話，路環竹灣豪園一座四千七百七十九呎嘅獨立屋，四層高，有車房，由一名香港用家以一千一百二十萬買入，呎價二千三百幾。佢話三個月前同類單位嘅成交價只係四百零萬。
對於近期澳門樓市，佢表示，呎價最高係濠景花園荷花苑A單位，面積一千七百九十二呎，成交價四百四十八萬，每呎二千五。荷花苑已經有九年樓，估唔到都咁值錢。
另外，新入伙嘅氹仔雍景灣，一座十九樓C室，一千四百二十二呎，剛以二百八十二萬沽出，一千九百八十三蚊呎，創咗樓盤嘅新高。
新地觀塘日與夜概念商場APM，噚日邀來人氣歌手王力宏搞小型音樂會，宣傳吓個場，第日更會引進二十四小時自動售賣機，為數超過二十部，其中一部係畀啲客買滿指定數額，免費換取王力宏限量簽名新碟。
租務主腦馮秀炎話，售賣機會集中喺APM六樓大約五百呎樓面，陸續有好多潮流限量版物品出售，發展商會向商戶提取營業額大約五至二十個巴仙，作為租金，𠵱家同無印良品傾緊，引入特色商品，可能會有特色香水、化妝品、水晶、零食、衫、紀念品、節日物品甚至如壽包等發售。
電郵地址：
