大概覺得「章子怡生擒霍公子」那雜誌封面標題很有噱頭吧？於是將之整個兒套用在《MeettheFockers》身上，變成《非常外父生擒霍老爺》。面對這麼長而奇怪的中文譯名，聽見觀眾在排隊購票時吞吞吐吐說：「唔該……呀……兩張……呀……呀……外父吖唔該。」
《MeettheFockers》是一齣大片，大不在製作，大在卡士。第一集《MeettheParents》大收旺場，第二集除了原有的羅拔狄尼路及賓史迪拿之外，重金加入德斯汀荷夫曼及芭芭拉史翠珊，幾個月前在美國的電影院中看見此片的預告時，觀眾一陣騷動，退休CIA外父碰上兩大高手親家，肯定好戲連場，結果在美國喪收了2億7千萬美元，20億港幣有多，問你怕未?!
《MeettheFockers》很有啟發性，因為近年能在荷李活或世界市場大賣的電影幾乎都是一些用錢堆砌的大型製作——巨型爆破、戰火連天加上特技翻飛，罕有地《MeettheFockers》是一齣製作異常簡單的處境喜劇，製作費並不昂貴，港產片畀得起有突。大卡士當然貴，但投資者通常又會好肯畀錢大明星使，因為收得你咁貴就因為賣埠可以賣番咁上下錢，若然唔係又應該冇資格收咁貴。其實《MeettheFockers》並不十分特別精采，講真句港產片味重好重㖭，尤其係出到「講真話藥水」橋段，基本上「誠實豆沙包」重惹笑啲。幾位超級演員交足功課但冇乜大驚喜，最出位的反而是那個ＢＢ仔，不過早在80年代的《最佳拍檔》系列中，光頭仔早已表演過一次，甚至係更精靈活潑，不知當日的光頭仔，今日的王嘉明看此片時會否有同感？