奧尼爾𠵱家着緊乜嘢牌子嘅波鞋？相信好多球迷都答唔出。「巨無霸」噚日就公開展示為佢度身製造嘅戰鞋。對鞋除咗size大之外，最特別係鞋底竟然裝咗一部手提電話！果然夠創意，不過小記對其實用性就有啲懷疑。試問邊個會對住鞋底講電話？
今年嘅入樽賽最無癮嘅可以話係黃蜂嘅基斯安達臣，佢第一次嘗試拋球彈地後入樽就失敗，結果要拋咗成六至七次先至成功。第二次同隊友JR史密夫合作又要試成三、四次先至掂，唔單止畀啲觀眾勁噓，而且重拖慢晒比賽節奏，好心佢練好啲先至嚟比賽喇！
明星賽周末對於一班年輕球星來說係一個大開派對狂歡嘅時候，不過對於一班已成家立室嘅老將嚟講就是一個家庭同樂日。好似前太陽射手馬傑利、騎士老將史奴、熱火嘅奧尼爾、馬刺名宿大衞羅賓遜，個個都帶埋囝囝囡囡嚟趁熱鬧，認真溫馨。