大狀黨湯家驊嘅將軍澳地區辦事處噚日開幕。呢個辦事處位處商場，舖租大嗱嗱要萬幾蚊，搞到湯大狀肉都痛埋，佢同八方講，迫住租商場皆因啲屋邨嘅平舖有排等，再等落去啲人以為你唔做嘢就唔掂啦！
湯大狀話，原本諗住今年出雙糧畀啲助理，但盤數計嚟計去都計唔掂，佢已經交埋份五萬幾蚊嘅議員人工出嚟，年尾埋單重要貼好多錢；佢啲助理都好抵得諗，決定交番份雙糧出嚟填數！為咗答謝義工們捱義氣，湯大狀今年每人都封番封大利是補數。
噚日開幕禮差唔多成個民主派都嚟晒咁滯，黨友余若薇話，湯大狀喺法律界出晒名招積，以為自己乜法律都識，不過做咗議員之後就唔會招積啦，因為要以民為本。
咁多個司局長，淨係得周一嶽、馬時亨同林瑞麟送花籃到；商界方面，幫藝林國際推銷西九嘅信和執董余惠偉就有嚟捧場。佢老兄原來識咗湯大狀好耐，因為雙方不時有業務往來，慢慢就變成好朋友。八方問余惠偉有冇游說湯大狀支持單一招標，佢老兄就話，同湯大狀咁熟，所以唔會講呢啲嘢，廢事佢難做啦！
（圖）湯家驊辦事處開幕，民主派齊齊到賀切燒豬；左起：鄭經翰，吳靄儀，余若薇，湯家驊，劉慧卿，湯大狀太太楊蕙蘭，張超雄，李永達。
成啟聰攝
傳真︰2623-9278
電郵︰