早前公布全球最富有足球會排行榜中，曼聯又再高居榜首，但紅魔為咗開拓新收入來源，計劃同拉斯維加斯一間公司合作喺英國開賭場。
拉斯維加斯嘅賭場公司一向世界聞名，今次佢哋就睇中曼聯呢個品牌，希望藉佢哋嘅名牌效應，互惠互利。興建新大型賭場計劃中，除咗有一千二百五十部博彩遊戲機之外，最大賣點係賭注不受限制，吸引更多顧客捧場。曼聯方面就話雙方商談合作計劃只屬初步階段，未有任何決定，但就否認賭場設立喺球會主場館「夢劇場」內。
其實，除咗曼聯外，曼城同英冠球隊列斯都計劃申請賭場牌照，增加收入；但若然新英國博彩法例通過，只會批准國內設立八間面積不少於五千呎嘅超級豪華賭場，難怪曼聯想快人一步。
首屆中超聯冠軍深圳健力寶繼續問題多多，主將李瑋峰最近就因薪酬問題，決定唔簽新約，因為球會早前承諾就算唔加薪，都唔會減薪；但球會出爾反爾，要求佢同其他主力球員簽一份減薪合約，雙方處於僵局。下個月初新一季中超聯重開前，呢支衞冕冠軍都未必能解決問題。
朗拿度爸爸喺里約熱內盧間豪宅日前被人入屋行劫，據講朗拿度好多珍貴物件都被掠去，當中有成百件波衫，包括世界盃決賽同德國龍門簡尼交換嗰件衫都被人撻埋。朗拿度啱啱訂完婚返到球會操練遲到被罰，家吓又唔見咗有錢都買唔番嘅珍貴物品，可謂霉運當頭。
畢爾包日前二比○贏皇馬，最拍爛手掌嘅係二十三歲右後衞伊拉奧拿嗰球五十碼遠程炮，簡直係二十一世紀「第一遠射」（雖然入咗唔計）；今仗缺席嘅卡路士喺彭美拉斯都係靠呢味起家，不過睇嚟佢老兄可以早唞喇！球迷們！以後睇畢爾包記住留意多件十五號嘅伊拉奧拿喇！
雷耶斯前排誤墮電話陷阱錯訴心中情，搞到𠵱家喺阿仙奴鬼死咁尷尬；而喺呢個時候，佢個西班牙女友不但冇用行動支持佢，重發出最後通牒：一係返西班牙，一係就同佢分手。我求大俠認為男人應以事業為重，唔應該受女友左右嘅，畀心機踢好波，轉會嘅嘢暑假先算啦！
逢周一至周五見報