雞年新春假期喺一片熱鬧歡樂氣氛中度過，呢排市道暢旺，可望新歲經濟有起色，好多港人都出手闊綽咗，大使身邊一班朋友同埋姨媽姑姐嘅仔女，今個新年都收多咗利是，大家滿足又開心。
不過，喺香港呢個貧富懸殊嘅社會，仍然有唔少生活喺貧窮線上嘅兒童，佢哋往往連最基本嘅生活需要都滿足唔到，大使就見到一位貧家中四學生，佢好無奈咁話自己每個星期只得六蚊零用錢，另外要行路返學，大使聽到都感受到箇中辛酸。
為咗將歡樂帶畀貧家孩子，同埋幫佢哋達成心願，蘋果日報慈善基金特別成立「童夢成真」專戶，透過滙聚善長捐款同支持，為貧童帶來希望。
呢個專戶舊年曾經安排孩子去食自助餐、睇舞台劇、遊海洋公園等，另送贈波鞋、書包、新衫、英文字典畀啲小朋友，令佢哋笑逐顏開。
大使趁「新正頭」，呼籲各位善長慷慨解囊，而𢭃咗唔少利是錢嘅後生仔女，請捐出一封利是，多少隨意，你嘅實際行動，可令更多窮困兒童得償心底願望。
「童夢成真」專戶捐款編號：C0121
暖流熱線
電話：29908688
傳真：23702192
電郵：
網址：