英國巨胸模特兒佐敦（Jordan）原來一直都唔多滿意近年嚟多次胸部手術嘅效果，所以佢最近決定進行第五次手術，不過今次佐敦唔係想再整大啲，只係想效法佢偶像彭美拉安德遜（PamelaAnderson）咁，整番對又圓又挺、睇落又好假嘅巨胸喎。
現年二十六歲嘅佐敦，胸部已經做過四次手術，但佢承認一直唔係好滿意，一個同佐敦好熟嘅爆料者話：「佐敦最近已經同英國嘅整容醫生傾過，佢準備再做胸部手術。佐敦話自己其實好想個胸可以整得比較『美國化』，佢最憧憬嘅就係拉姑彭美拉嗰對胸，因為喺美國，通常啲女仔會整得對胸更加圓同挺。」
回顧佐敦過往嘅整胸歷程，佢喺九八年第一次由32B變成32D，再喺一年後增大至32DD，到二○○○年，佐敦再度升Cup至32FF，佢上年重花費六千鎊，即係約八萬八千港元嚟做咗個防止胸部下垂嘅手術。不過聽聞如果佐敦被選出代表英國參加新一屆Eurovision歌唱大賽，咁佢就會押後到今年夏天完結前先至去做手術喎。