民政事務局日前開農曆年春節酒會，局長何志平率領一眾人等喺大門口迎賓，八方見到煲呔前愛將蔡潔如排喺隊尾招呼賓客，先至記得佢已經調咗去康樂及文化事務署成三個月，做咗副署長，佢個位就由何健華接咗。
Kitty（蔡潔如）話佢𠵱家負責行政，所以好少出嚟見人，工作地點喺沙田，唔怪得啦。Kitty當年做粵港合作統籌小組嘅小組組長，成日都要往返中港兩地，又要見吓記者，梗係忙啲，𠵱家總算可以坐低做吓辦公室工作，民政對佢嚟講係新嘢，但係應該考唔起AO。
煲呔另一個愛將朱曼玲亦調升咗去環境運輸及工務局做副常秘，一樣因為少咗出嚟行，曝光率梗係少過以前跟住煲呔四圍去。
周街都收料話煲呔會做下屆特首，佢咁念舊，一定會預埋班舊部，蔡朱兩位阿姐前途大有可為。
傳真︰2623-9278
電郵︰