賭王率先吹雞，合和胡應湘嗱嗱聲跟住落注，學舌大擦當奴曾，又話佢有九十分，可以做特首！
嘩，乜壽爺澳門一握手，真係如有神助？搞到呢兩日，全個中環已經好似唔係當奴做唔做特首嘅問題，而係邊個會陪跑嘅問題！
既然賭王經已第一個霸咗頭位，其他富豪想擦鞋，與其執賭王口水尾獻媚，不如自己報名陪跑，促成當奴好好睇睇咁做皇帝！
當然，當奴若然係由壽爺親自欽點，自己又參選，咁咪即是反華反共、反胡反黨中央？梗係唔係喇！只要參選時發表宣言話：「細佬今日又參選特首，查實無意威脅曾爺，只不過想跟曾爺學吓嘢，因為同曾爺一齊參選，同佢一齊企埋一個platform，呼吸同一樣嘅空氣，係細佬我一生最光榮嘅時刻，所以我參選特首，唔代表想當選，只不過協助曾爺，令佢可以喺一場民主選舉之中體面得勝，等到啲民主派同外國勢力冇聲出！」
哥頓胡不如考慮吓做呢個角色，咁當奴贏咗，一定會官商合作，包保佢嗰棟大佛口酒店起得成，重會拆多幾條街嘅舊樓，畀胡爵士起番個「合和城」，將來重起埋條地鐵支線㖭！
因為，世上有幾多個好似阿董咁小器，人哋阿正七年前肯陪跑，助佢當選，點知到咗今日，連座海運大廈都唔肯續約，直頭恩將仇報吖陰功！
當奴做硬？講到似層層，不過當奴始終係前朝人士，咁早俾人揪出，又好易橫遭老左土共暗算，搞到見光死都唔定！所以當奴話定自己告老歸田！民主派就冇叉用，眼光光睇住民進黨（民建聯及港進聯媾合之後嘅新名稱）指手畫腳，話要召見審查特首候選人，民進黨擺到明就係警告緊當奴等人，想做特首，一定要得到土共批准！
真係惡喎！咁民主派呢？自己又可唔可以提名一個，例如陳太？陳太民望最高，若然連入圍都冇，理由係前朝餘孽、肥彭心腹、美英卧底特務，咁就畀全世界睇吓，呢啲係邊一科嘅「選舉」？
傳真︰2623-9278
電郵︰