大學畢業後，打了一年工，跟着就變成了freelancer「自由工作者」，想起來，已經有很多年了。自由工作者，顧名思義，工作得很自由，返工時間自由，放工時間自由，放假時間自由，工作的選擇自由，總之很自由！很多人很羨慕這種自由自在的生活模式。一班朋友一起睇波，剛剛「車仔」入了波，大家一齊大叫之際，看看手表原來已經是深夜一時多，這時總會有人對我說：「你就好啦，聽朝唔使返工，瞓到幾點都得。」
很難清楚界定每一位freelancer實質之工作，更難為他們定一個清晰的工作title。最怕有朋友問我是做甚麼的，因為總不知怎回答，又不知從何說起：「我……做音樂嘅，寫吓歌、編吓曲，不過𠵱家做少咗啦。𠵱家有時幫吓人或者機構製作CD。啊，剛剛setup咗一間studio，所以𠵱家會接吓啲錄音或者VO返來做。啊，我重有教吓琴，剛剛重教緊個毅進嘅音樂課程㖭。」朋友的反應總好像聽完好似冇聽，摸不着頭腦。
「啊，我𠵱家重有寫吓專欄咁啦，都有幾處地方見到我啲文章㗎……同埋𠵱家重拍埋《頭條新聞》㖭。」「你做導演定做攝影師？」「唔係啊，我做主持啊，會出鏡㗎。」
通常，大部份朋友在這一大堆資訊中，只會接收到我會一星期在電視上出鏡一次，跟着就會繼續問：「唔，我想問你一個小小的問題，究竟你是怎樣維生的？」我又要從頭講一次我的日常工作。
朋友繼續盡力為我界定，連我自己也說不清楚的工作title。究竟，我是打甚麼工的呢？