胡杏兒在無綫劇集《西廂奇緣》中扮演紅娘一角，專為有情人穿針引線，現實中的杏兒雖然有個拍拖四年的外籍男友，但她揚言因父母婚姻失敗，令她對婚姻欠缺安全感。杏兒認為同居亦屬自掘墳墓，個人絕不考慮，至少待她奪得「我最喜愛的女主角」獎項後才會考慮婚事。
採訪：朱倬誼
攝影：陳慧安
服裝：MissLauEternityLtd
「同居係自掘墳墓」
胡杏兒與外籍工程師男友拍拖四年，雙方感情穩定，不過她曾先後與林峯、陳鍵鋒及黃宗澤傳緋聞，未知其男友可會呷醋？杏兒說：「佢都唔睇雜誌嘅，我哋好穩定，其實係需要一個平衡，需要一個人去支持吓，有個傾訴對象，雖然佢唔係做呢行，但佢會明白。」
杏兒經常忙於拍劇，與男友見面時間不多，未知他會否詐型？杏兒說：「我哋唔會嗌交，佢亦都唔會呻，或者知呻都冇用，佢都想我好㗎，多嘢做至證明事業愈嚟愈好，要嘅唔係quantity（指見面次數），係quality（質素），唔開心嘅話成日對住都冇用，少時間見反而OK，我知佢會慘啲，有時都冇辦法，但佢算係一個好好嘅男朋友。」
既然感情穩定，杏兒會否已認定對方為結婚對象？她連忙笑道：「咁後生，冇諗呢啲嘢㗎，過多幾年至問啦，冇plan㗎，等事業再好啲再講，事業啱啱至起步，𠵱家都唔興早結婚。」那麼杏兒會否接受同居生活？她說：「我覺得同居係自掘墳墓，同結婚都係爭張紙之嘛，但好恐怖呀，我覺得大家應該有自己嘅空間，同居就會冇咗大家想見對方嘅感覺。」
杏兒家有三姊妹，她是孻女，父母在她很小的時候已經離異，三姊妹由父親撫養。後來杏兒的爸爸再婚，她在十二歲那年便被安排往北愛爾蘭留學。上一代婚姻失敗，令杏兒或多或少對結婚欠缺安全感，她說：「都會冇乜安全感㗎，順其自然啦，𠵱家梗係做嘢緊要，起碼攞埋女主角獎先啦。」
杏兒稱當年的留學生活令自己學懂如何獨立自處，對人生亦有自己的一套看法，她說：「以前我諗嘢幾負面，但𠵱家就會開心面對，會開心咁生活，令自己不枉此生。好似以前見啲人寫埋啲是是非非，都會唔開心，𠵱家唔會啦。做人真係要樂觀啲，我爸爸最近發現有糖尿病，都好突然，所以我更加想令佢開心啲，好彩睇完醫生之後，情況都OK，佢食咗三十幾年煙都戒咗。」
「識落就知我低能」
胡杏兒近年是非不絕，傳言總離不開指她態度囂張或耍大牌，對此杏兒說：「可能係因為我個樣好似好醒咁，其實我好蠢，雖然自己都有啲地方係聰明嘅，但我唔係一個有機心嘅人，有啲嘢怕講多錯多，唔講嘢又會被人感覺好高傲。我幾怕醜㗎，第一次見唔識嘅人，我會唔敢望，畀人感覺係寸，識落就知我好低能。」
最近杏兒被指與葉璇拍攝播放中的劇集《西廂奇緣》時爭戲份而不和，又有報道指她早前拍《我的野蠻奶奶》一劇時，向黃宗澤放生電，對於上述傳聞，杏兒一一否認說：「冇呢啲事！開親劇就成日寫呢啲嘢，我當花邊新聞睇㗎咋，一係話你不和，一係就緋聞，我真係咁識電人就大把人追啦，男仔都唔鍾意我呢類型嘅女仔，太男仔頭、太strong嘞！男仔都係鍾意女仔小鳥依人，溫柔啲，我都想自己溫柔啲呀！放電？我天生唔係呢類型！」
提到與葉璇之間的關係，杏兒說：「實情我哋係朋友，喺日本拍《衝上雲霄》外景時，我哋住埋同一間房，大家又喺外國返嚟，溝通都幾好，幾傾得埋㖭。戲份係公司安排，我唔會同人爭，公司覺得適合嘅會委派畀我去做，自己做唔嚟嘅嘢爭住做嘅話，盞嘥咗個角色，令自己更加難睇，我寧願做啲自己能力範圍以內嘅事。」
杏兒十九歲參加港姐選美出身，在短短五年內成功躋身姐仔行列，事業發展已拋離同期的廖碧兒、楊怡及原子鏸等。杏兒在前年劇集《流金歲月》中扮演儍妹一炮而紅，雖然星途暢順，但她表示也曾經有段迷失的時期。
杏兒說：「嗰時自己太細，冇乜人生經驗，又冇明確目標，點解我做嚟做去都係做人細妹？諗番轉頭，我慶幸自己有咁嘅階段，一嚟就畀主角我做嘅話，我已經被人淘汰咗，你唔會見到我重喺度囉。初頭拍嘅幾部劇，令自己學識一啲基本功，拍到第六套劇《流金歲月》，遇到好多人幫自己，有Tommy（戲劇組高層梁家樹）、撈家（羅嘉良）同Paul哥（秦沛）等等，令到自己拍戲時好易投入，佢哋亦都畀咗好多鼓勵我。」
其後杏兒再接拍《衝上雲霄》，經拍檔吳鎮宇指點，她終於真正開竅，杏兒說：「佢同我講，做每一個角色都要諗個角色生命，即係角色自傳，角色嘅前後發展，唔好A對白、B表情、C笑容，要由心演，以前我好迷惘，但鎮宇可以話係一個令我開竅嘅人，令我識得投入角色生命。」
