鄭希怡（Yumiko）與吳浩康被踢爆戀情後，昨日一同到尖沙嘴出席《第三屆美容產品大賞頒獎典禮》，兩人前後腳到場，最終仍大方合照，穿上三吋高踭鞋的Yumiko，還作狀蹲下遷就吳浩康。
Yumiko起初與吳浩康一同接受訪問，但吳浩康不停搶答，待吳浩康離開後Yumiko才說：「佢都係好嘢，不過我哋𠵱家唔係拍拖，有冇機會就唔知，識咗咁多年。」Yumiko不介意對方比自己年輕，至於情人節有否收禮物，她則說：「佢就嚟出碟，唔好信呢啲出碟伎倆，咁膚淺。之前話英皇唔畀藝人拍拖，𠵱家英皇最贊成，公司有好多對啦。」
Yumiko大讚吳浩康勤力有禮，唱歌又動聽，問兩人現時是甚麼關係，她說：「咪姊弟戀囉，緋聞情侶呀。其實我都想拍拖，但未揀定，影到咪公開囉。」
另一方面，吳浩康前晚出席活動時否認曾與胡定欣拍拖，只表示五年前曾追求對方，但失敗而回。
採訪：胡比
攝影：葉君海