離開咗醫管局嘅高永文認真「有心有力」，佢上年十月跟苗圃行動長征助學之後，睇怕行到上咗癮，所以準備下個月做領隊，率領五十幾個葵涌醫院、瑪嘉烈醫院同澳門嘅醫護人員繼續長征，參加苗圃行動助學長征嘅第五段路程，即係貴州黃果樹瀑布嗰一段。咁多醫生護士一齊行，其他參加者有乜頭暈身㷫都唔使驚啦！
高醫生話上次行江西路段行到腳腫，所以今次專登掃定十支八支消腫嘅雲南白藥噴劑帶埋去。上個禮拜佢重帶咗成班醫護去城門水塘練習行山，又專登去深圳掃咗好多有關長征歷史嘅書，諗住一路行一路回顧吓歷史咁話！
見到成班醫護人員咁齊心，身兼瑪嘉烈醫院及葵涌醫院管治委員會主席嘅立法會議員方剛，喺噚日嘅苗圃行動記者會上承諾會捐出十萬蚊，為班醫護人員打氣。高醫生話連埋佢自己落街市籌款，同埋班醫護人員籌得嘅善款，相信最少可以幫助內地山區學童起三間學校。
（圖）高永文（右）率領醫護去助學長征，方剛（左）即刻捐十萬蚊支持佢哋。
傳真︰2623-9278
電郵︰