今日可算是到美國後，最充實又最忙嘅一日。不過百忙中收穫甚豐，其中最開心嘅莫過於同童年偶像之一格蘭希爾做到訪問。
今日正式展開明星賽之旅，初步對丹佛嘅印象都唔錯；因為好多主要建築物好似PepsiCenter、舉行JamSession嘅ConventionCenter、以及NBA的媒體酒店都集中晒喺downtown，非常就腳，而且重有免費穿梭巴士行走主要嘅街道──當你全身相機、加埋電腦成十幾磅時，都真係幾幫到手。
講番今日，雖然晨早就要去酒店預備希爾嘅訪問，最慘係我間酒店唔喺downtown，所以要更加早出門口；不過可以一睹「復活」後希爾嘅風采，真係幾累都值得。
做完專訪之後，即刻趕去做全明星賽嘅官方訪問；做完大約三點鐘，仍未有時間醫肚，因為跟住又要到美國最出名嘅波鞋雜誌《SoleCollector》採訪，其間重出席由安東尼主持嘅AJXX派對。你話係唔係夠晒忙？
經過NikeTown時，見到門口大排長龍，原來今晚有限量版嘅勒邦占士AirForceI發售，唔怪得中午已經人山人海，大帝魅力認真厲害！