《功夫》3區DVD，出？唔出？農曆新年前已傳言多多！人人望穿秋水等22號，點知「嘭」一聲18號星期五爆咗出嚟！普通版、磨砂版、限量真皮DVD禮盒裝，一嚟三個版本，叫人唔知買得邊個，又再係傳言累事，坊間流傳DVD碟內容不盡相同！喺度澄清三個版本都係單碟冇刪除片段！內容完全一樣！
記者、攝影：朱崇德
未過農曆新年，四周碟舖開始收到《功夫》訂貨Fax，當時戲院正上映得如火如荼！據可靠消息，當時各大戲院警告唔過6,000萬票房唔準出碟，所以宣傳攻勢馬上收斂，「出？唔出？」之疑惑因此而來，截至本星期中，問好多DVD舖都重估緊本周尾定22號到貨之際，18號星期五一朝早（戲院當日重上緊《功夫》），一開門竟然就馬上到貨！殺一個措手不及！
多年罕見 銷情凌厲
《功夫》以6,000餘萬成為港產片票房一哥！挾住「未落畫出碟」之勢！旺角首日銷情，平均每間舖都有數百隻！真係多年未試過有碟可以咁熱賣，唯一可以與之比拼者，都係多年前嘅《少林足球》同《臥虎藏龍》。
一出三個版本，亦係叫碟迷無從入手嘅原因，教大家一條簡單算術！每間舖平均要入貨40-50隻普通及磨砂版，大概可以分配到1隻限量真皮DVD禮盒裝，而再儲滿5個「禮盒裝」，就會送《功夫》手表及2005年曆一個！如果喺舖頭想買，唔該先買「禮盒裝」再加$50-$100。
刪除片段 完全欠奉
《功夫》另一令人迷惑之處，就係碟面所寫「電影足版不經刪剪」，簡單講就係99分鐘戲院版「未經刪剪」，所以冇多亦冇減；不過Bonus竟然是6套其他電影預告片，至於後期戲院「買2票」送的刪除片段VCD內容都欠奉，失望！畫質可以用相當完美形容！至於音效，有香港影碟網站作測試，所得數據為粵語dts（768kbps/最高1,536kpbs)、粵語/國語DD5.1（448kbps/最高448kpbs）；雖然「未做到盡」，不過都已經拍得住戲院水準！如果想聽槍劍「錕錕聲」、拳頭打到「嘭嘭聲」，都係以dts聽會得出最「到肉」的音效。
水貨佬 香港掃貨
至於《功夫》嘅炒賣情況，香港由於貨源尚算充足，所以「提價」機會甚微；不過今次港版3區非常「鬼怪」地使用全英文Menu，而且連字幕都竟然有英文！須知《功夫》在歐美等地區都重未上映，所以好多水貨商已開始在香港掃貨！當中尤以「限量真皮DVD禮盒裝」俾人搶得最厲害，相信有機會斷貨！另外據行內人消息，遲些日子可能會推出「刪除片段」單碟DVD，想等完美雙碟版暫時全無聲氣，所以想買就好買喇！
DVDPRO
地址：旺角奶路臣街6E德發商場地庫B4舖
電話：23326326
