麗新國際（191）上周五屬系內升幅最搶眼一隻股份。呢隻旗艦，97年高峯期講緊5蚊樓上，7年嚟，勒到實，再度起航。事實亦應該係咁。麗國家陣揸住麗展（488）12.4%，同時又以附屬或聯營方式，直控有鱷魚恤（122）及麗豐（1125），應佔呢3家嫡系市值9.92億元，麗國本身市值，不過5.9億元。麗國市值翻一番（也代表股價翻一番）到12億元，呢隻旗艦，先夠份量壓場。再講，麗國未重估每股資產值1.26元，本身底厚，要翻一番，麗國有條件、夠資格。
另外，麗國及直控嫡系，就算呢兩年有唔錯盈利，都未曾派過息，守業味道好濃。可以憧憬，新人事下，利益以旗艦為依歸，日後有分派，甚至若然有重整變化，麗國會成最大受惠者。
麗國上周五大撼大，成交1089萬股，係個半月以嚟最大成交一日，以大成交扯到上全日最高位0.415元散場嚟睇，市場對麗國可以擺脫保守作風，繼而注入積極活躍元素，評價正面。
金匡（286）上周五成交2700萬股，亦係個半月以嚟最大成交一日，實情異動，又講兩點。第一，金匡03年重組，1仙股價100合1，跟住由已合股1蚊水位，掉頭插水，現價等於未合股前0.4仙，呢個價位，03年前未造過，唔係蟹貨區，況且，金匡街貨不過2.93億股，非常乾身。第二，金匡大股東係華置（127），華置個名，本身已經夠照，加埋呢期華置系股份，生猛異常，金匡可以炒一脈相承。事先講明，金匡資產值欠奉，純粹momentumtrade，講求嘅又係眼明手快。
錢雋