新聞之花張寶華早前辭職離開咗有線電視，唔少支持佢嘅觀眾冇見佢一排，一定都會好失望。不過，大家唔使心掛掛，寶娃娃噚日晏晝就去咗香港電台《政治與人生》嘅節目擔任嘉賓，同節目主持發叔黃宏發一齊開咪，大談政治人生。雖然今次唔係見樣，但聽到佢把靚聲，相信佢嘅fans一樣會咁開心。
平時電視就上慣嘞，咁上電台節目嘅感覺又係點呢？原來寶娃娃今次只係第二次做電台節目，佢話上一次以嘉賓身份上電台做節目，已經係一、兩年前嘅事，而今次同發叔一齊做節目，重要個節目講政治與人生咁嚴肅，佢就話覺得心情真係好戰戰兢兢。
雖然心情緊張啲，但係寶娃娃喺節目裏面都同發叔有講有笑，似乎主持電台節目對佢嚟講一啲難度都冇喎！好似話點樣配合新年嘅話題講人生咁，寶娃娃就講到喺林村斷咗嘅許願樹，佢話好戥棵樹可憐，又憶述佢當年都試過去嗰度拋寶牒，但就拋唔到，重俾個跌番落嚟嘅橙中正咗兩次頭獎㖭。
又好似講到最近環境運輸及工務局局長廖秀冬民望最高，寶娃娃就以傳媒人嘅心態話嘞，唔係因為冬冬係女高官所以特別討好，而係冬冬真係做到嘢，表現平穩咁話喎。寶娃娃咁識講嘢，唔知佢會唔會去電台發展呢？如果係咁，大家就可以大飽耳福嘞。
（圖）張寶華闊別螢光幕一輪，噚日喺電台開咪，最開心肯定係佢班fans。
傳真︰2623-9278
電郵︰