前些時本欄講「FCC以西」，估唔到竟然有記者、讀者來電話、電郵嚟問：「何謂FCC？」原來自己視為理所當然之事，其他人係會唔知道自己講乜嘅，唔怪得《亞洲華爾街日報》呢份專業財經報紙，好多時提到price-earningsratio（市盈率）嘅時候，就會加插一個括弧內嘅解釋，事實上係《亞華》想得周到，為讀者設想。
「FCC」就係ForeignCorrespondents'Club（外國記者會），會址喺雪廠街與下亞厘畢道交接處，正確地址就係下亞厘畢道二號北座。FCC以西就係由雲咸街數起，向西環方向行走咁解，在FCC以西，你會搵到蘭桂坊以及稍為遠啲嘅蘇豪區，餐廳酒吧林立。
另外一件左丁山想當然之事就係梁玳寧小姐嘅專欄。一位女讀者Susanna問：「梁玳寧小姐專欄可在哪兒看到？」大笑之餘，順便為朋友賣一句廣告，希望編輯唔好嬲，梁玳寧現於《經濟日報》有一個專欄！
解答完畢，講番賓架Ｐ之教書故事。此日在上海總會碰到佢，知道佢在北京、台北以及母校兼職教書，講授實用公司財務。佢每次上課三小時，在台灣，學校指示講足三小時就可以下課；到咗北京，大學指示要講三小時加十五分鐘，讓學生覺得上課物有所值；香港母校呢？兩個半小時後就可以隨時下課，因為啲學生會開始覺得不耐煩！賓架Ｐ話：「我巡迴教書，志在服務，不計酬勞，好想學生學到嘢。比較之下，香港啲學生學習態度就鬆散啲。一位香港學生竟然來電郵話佢好想選修我嘅科，但因為時間問題，佢只係想聽書，冇時間與台北、北京啲學生一齊做project，問我可唔可以免除呢項條件？」如此學生，令人啼笑皆非，如果左丁山係賓架Ｐ，就會回電郵叫學生咁唔得閒，不如留番響宿舍瞓覺，上堂嚟做乜！