立法會班議員噚日趁新年宴請董團夥。主席范太特登請咗太極師傅李暉，喺開飯前表演幾招太極助興，重搵埋肥亨、肥平，同民主黨肥仔明、自由黨張宇人同民建聯譚耀宗，即場跟住李師傅學幾招太極，娛樂性直迫《殘酷一叮》。
老董就死都唔肯身先士卒出嚟耍。五個肥佬耍完後，台下班官同議員就做裁判，投票選邊個耍得最掂。肥亨以十九票榮登本周台主，肥平就輸個馬鼻得十六票；肥仔明同埋張宇人最慘，各得兩票支持，譚耀宗就有八票，其中一票重係民主黨嘅單仲偕，肥仔明都忍唔住鬧佢「黨性差」，連自己友都唔支持！
八方睇落個個都耍得差唔多，肥亨今次做咗台主，都係因為財金官員舉手，加埋孫公、廖秀冬、曾俊華、行會史美倫嘅支持；肥平都唔差，贏到老董、三司同埋周一嶽幾票。
肥平冇贏到都算好彩，「太極王」呢啲獎真係送畀你都唔好要，唔知班財金官員真係支持老細，定係唔滿意一問肥亨攞資源，佢就搏命耍太極。就連老董喺頒獎同紀念品嘅時候，都乘機抽水話：「我發過誓，對住立法會議員，我唔會耍太極！」
李師傅今次教佢哋耍嘅係「養生太極八式」，其中第四式叫「玉堂映日」大有玄機。李師傅特別提醒佢哋，「日頭（頭部）就高高在上，留意功高唔好蓋主（指手掌）！」呢句真係講中老董嘅心底話，怪唔得老董聽完呢句，都忍唔住拍掌。
范太話自己今年犯太歲，所以唔敢講咁多嘢，搞耍太極其實係為大家好，因為啲官同議員工作繁忙又唔夠瞓，好易心煩氣躁，耍吓太極可以保持健康，識養生就唔會火氣太猛。
（圖）李暉師傅喺立法會耍太極，你話後排邊個姿勢最似樣？何志平（右）、馬時亨（左三）、李華明（左二）、張宇人（左）。
傳真︰2623-9278
電郵︰