英國萬人迷碧咸（DavidBeckham）早前聯同籮霸珍妮花洛庇絲（JenniferLopez）同BeyonceKnowles拍嘅百事可樂廣告據講用咗幾百萬英鎊，下星期會喺全球一百七十個國家首播。廣告商繼日前公開碧咸同兩位靚女嘅造型後，前日再公開碧咸扮日本劍道高手嘅造型照，睇嚟有板有眼。
碧咸、籮霸同Beyonce今次合拍嘅廣告，故事背景發生喺香港，廣告商話內容係以電影《臥虎藏龍》同《標殺令》嚟做借鏡，故事講Beyonce同籮霸以卧底身份聯手對付武功高強嘅碧咸。喺新公開嘅廣告造型入面，碧咸着住日本武士袍，手持木劍扮劍道高手，而籮霸就身穿緊身皮衣同揸住電單車頭盔，睇嚟會有打鬥及鍊車場面。
碧咸初次同籮霸、Beyonce合作後不忘大讚兩位靚女，佢話：「今次真係一個好難忘嘅經歷，佢兩個的確好叻。」