雞年第1周5個交易日，梅花間竹，升3日跌兩日，恒指埋單有242點進帳，石油股份跑贏大市，油輪生猛。
中石油C輪：中石油（857）全周升3.9%，收4.625元，最高見過4.70元，距離歷史新高4.95元唔係太遠。中石油咁嘅價，暫時要再上去，再破高位機會唔大。不過就算認為中石油會回頭，都冇嘢可以做，皆因4隻P輪成交金額夾埋都唔夠7萬銀，最長壽命都係5個月，溢價14%至40%，全部買唔落手。
要做嘢，不妨等正股有適度嘅調整之後，低位買C輪。中石油C輪正路之選係4656，11月到期，輪價41仙，溢價3.6%，槓桿率11.3倍（有效6.7倍），引伸波幅23%。冇調整得咁上下，唔買住。
中石化C輪：中石化（386）一周升幅1.6%，細過中石油，現價3.25元，距離1年前高位3.90元有成17%，若然回落些少，唔使等回落好多，即可以諗吓買啲C輪。
中石化C輪正路之選係4651，8月到期，輪價28.5仙，溢價5.7%，槓桿率11.4倍（有效6.6倍），引伸波幅29.7%。另外隻3862壽命長多1個月，溢價相若，槓桿率則差少少，亦係諗得過嘅對象。4651與3862，都係大成交窩輪，睇錯市都唔怕走唔切。若然睇淡中石化，亦冇嘢可以做，因為冇P輪。
中海油C輪：中海油（883）一周升幅7.5%，收4.275元，距歷史高位只係7%。𠵱家追C輪，風險大過利潤。唔調整得夠，唔買輪。低位吼C輪對象係4580，6月初夠鐘，輪價32仙，溢價3.1%，槓桿率13.4倍（有效8.7倍），引伸波幅24.1%。
章盛