林百欣當年雖然身為亞視大老闆，但在員工面前毫無架子，曾為林伯效力的藝人，昨日接獲林伯病逝消息時均深感哀痛，感慨萬分，亞姐冠軍出身的羅霖讚揚林伯為人勤奮，更認為香港人應向他學習，遇困難不要放棄。
羅霖：
林伯係一個好親切同勤力嘅長者，返工返足七日，佢成日都提點我要勤力工作，香港人都應該有林伯嘅精神，要勤力工作，遇到困難唔好放棄。我最敬重佢做好多善事，捐錢係億億聲，啲人成日話佢慳，其實佢慳自己唔慳人，我以前喺亞視台慶同新春團拜時陪喺林伯身邊，好多藝人成日返轉頭攞幾次利是，林伯係知嘅，不過佢都派完又派。
陳煒：
我以為林伯割膽石同跌親吓，唔知道咁嚴重！林伯平時都有做運動，嗰年一齊去馬場，佢行得重快過我。林伯為人冇階級觀念，鍾意同人分享心得同意見，記得有次我同林伯講話想喺台灣做美容生意，林伯即刻話好，重話台灣三溫暖搞得好好㖭。
杜汶澤：
我一出道就同林伯打工，𠵱家就同佢個仔林建岳打工，真係好巧合。我覺得林伯好勤力，無論佢幾忙都好，佢都會抽時間出席function。
張文慈：
林伯係一位好好嘅老闆，佢好體貼同照顧員工，試過跟佢返潮州公幹，佢好關照我哋。我好欣賞呢位長者工作嘅魄力同毅力，凡事親力親為，我祝福佢離去時可以舒舒服服，去一個好開心嘅地方。
尹天照：
好愕然，好唔開心，林伯好有魄力，我好佩服佢，而佢對員工好好，我咁講相信好多員工都會認同。
陳啟泰：
佢係一個事事親力親為嘅老闆，我覺得好可惜。
劉錫賢：
我初初入亞視做婦女節目時，一路以為冇乜人識自己，有次林伯出席亞視活動，佢竟然猛問肥仔賢喺邊，原來佢有睇我做節目，估唔到佢咁好記性，連婦女節目都有睇，令我好感動。
李香琴：
我同林伯生日只差一日，所以每年林伯生日，都會叫埋我一齊慶祝，林伯啱啱過咗嘅生日我都有出席。幾個星期前我都有同林伯見面，佢好精靈好精神，重以為佢大步檻過，點知冇幾耐就入醫院。
黎燕珊：
林伯一直都好支持當年亞姐所辦嘅仁美清聚，當年亞姐月薪只得幾千蚊，曾經有亞姐向林伯提出苦況，林伯即時眼有淚光話：「咁慘？我哋有啲商場舖位未租出，不如用來做休息間啦！」雖然亞姐其實想要求有服裝津貼或者加人工，但林伯一番心意都令大家感動。而林伯同佢啲朋友不時都有商場剪綵活動安排亞姐同藝人出席，好多時都係林伯自掏腰包封利是畀藝人。
