林百欣生前執掌亞視十年，當年林伯大開水喉掀起電視台挖角風潮，曾撬走曾志偉和沈殿霞等綜藝組台柱，又挖小生花旦如吳啟華、黃日華與鄧萃雯等拍劇，吳啟華更自爆當時加薪幅度升近十倍，鄧萃雯則大讚林伯開劇具誠意。
林百欣親掌亞視時期曾大開水喉，重金狂挖無綫藝員過檔。無綫綜藝組台柱曾志偉、沈殿霞、林建明、盧海鵬與何守信等均先後蟬過別枝，小生花旦包括吳啟華、黃日華、任達華、鄧萃雯、陳秀雯、曾華倩、商天娥、戚美珍和陳庭威等亦相繼效力，令九十年代的亞視極度風光。
吳啟華與黃日華多年前加盟亞視時均被銀彈攻勢打動，二人曾與任達華合演《還看今朝》一劇，吳啟華昨日在電話中說：「嗰時我入亞視，人工好好多，比無綫多咗冇十倍都八倍，由幾千蚊變幾萬蚊，個劇重收視好好，幫咗我好多，林伯好有魄力，令亞視有過輝煌成績。」
黃日華則說：「嗰時係林建岳搵我嘅，我同吳啟華、戚美珍、任達華幾個，都係第一代過亞視嘅無綫藝員，我都加咗幾倍人工，林伯計數叻，睇盤數好好，個人都好隨和。」鄧萃雯當年與商天娥合作拍攝亞視劇集《我和春天有個約會》，鄧萃雯說：「當年嘅挖角潮，唔係吓吓講錢，最重要係有誠意去製作，嗰時林生林太都有嚟探班，林太買埋消夜、煲埋湯畀我哋飲，好體貼。」
身在溫哥華的肥姐昨日驚聞林伯死訊，在長途電話中不禁愕然地說：「唔係嘛？我覺得林伯對啲藝人好好，林伯好勤力，係好親力親為嘅老闆，聽到呢個消息好唔開心。」當年曾志偉與林敏驄合作主持亞視《開心主流派》，志偉昨日說：「我同林伯合作唔太耐，但佢可以令同事團結。」曾與沙姐主持亞視節目《開心繼續笑》的盧海鵬稱：「我冇被高薪挖角，人工差唔多。」
採訪︰朱倬誼、戴彩煥
