美股周四因加息憂慮而下跌80點，阿虎以為成交正在萎縮的港股可能會大瀉，點知好友推高地產股，帶動大市回升。
有人話升市同下周二賣地有關，其實幅商貿地規模唔算大，難成焦點，但成交價可能會對嘉里（683）的估值略有影響。
聯通（762）噚日炒高3%，市傳中央仍考慮將聯通集團拆骨，其中包括中電信（728）新任董事長王曉初提出的建議，就是由中電信及網通兩大集團聯手收購聯通其中一個網絡。有老行尊話，如果未得中央支持，斷估王老總唔會咁高調向外提出呢個計劃。
恒指成份股檢討結果最後不變，聯想（992）仍能保住藍籌席位，網通（906）及中芯（981）要晉身藍籌仍要繼續等。國航（753）與中興通訊（763）成為大摩中國指數成份股後，又拖住手晉身國企指數成份股，但兩股有好消息出貨，逆市下跌。不過，唔排除芬佬稍後會追貨追到氣咳。
至祥（112）噚日股價大升35.29%，以全日最高位4.60元收市，市傳公司夥拍鄭裕彤到澳門搞商場及百貨業務。
至祥在1月才以每股0.95元配售5646萬股，集資5280萬元，跟住股價就由1元水平炒上，以昨日收市價4.60元計，承配人帳面勁賺逾5000萬元。
Cookie話，若果真係有大型項目落實，相信上次配股僅是前奏，跟住可能玩拆細兼供股，又或者出售手頭物業套現。
華人置業（127）早前成功將廣生行私有化，最近輪到至祥熱炒兼可能有新發展，照計金匡（286）亦不會受冷落，股價噚日升12.33%至0.41元。
阿虎