民主黨李華明噚日請班行家上去佢度拜年兼派利是。肥仔明話，佢下個月就會喺黃大仙開第四個地區辦事處，請咗衞生福利及食物局局長周一嶽，同埋搞領匯嘅梁展文主持開幕，至於佢嘅春茗都係下個月先搞，因為遲啲搞就可以平啲！
肥仔明個愛女今年考會考，本來佢閉門讀書，不過為表示好客，都特登放低書本，幫老竇捧盤年糕畀班行家食。肥仔明話，佢個女雖然同佢一樣讀文科，但佢就唔識個女讀啲乜啦，肥仔明七二年考會考，當時淨係必考中英，𠵱家就唔同晒啦！
拜年期間，肥仔明都不忘晒吓功績，順便踩吓宿敵民建聯嘅陳鑑林。肥仔明話，俾許願樹壓傷嗰個老伯，原本想搵陳鑑林幫手，不過陳鑑林就話要三月先得閒，於是佢就執二攤幫呢位老伯，原來個老伯就喺食環署做，佢即刻幫老伯同食環署攞假，等佢可以休養。
（圖）記者去肥仔明屋企拜年，當然唔少得𢭃利是啦！
傳真︰2623-9278
電郵︰